شــريان فلسطيني
كتبها@شاعرالأحزان احمد هيكل@ ، في 25 أكتوبر 2007 الساعة: 13:10 م
المسحراتى
**********
(2)
مقطع
شريان فلسطينى
اصحى يانايم
وحد الدايم
وقول نويت
بكره ان حييت
الشهر صايم
والفجر قايم
أصحى يانايم
وحد الرزاق
رمضان كريم
مسحراتى من جنود الأرض
منقراتى كل دقه بفرض
أطلب غنايا زى أب ضناه
القدس لاحت فى الطريق حضناه
يارب علمنى العطش والجوع
واجعل لعينى دموع
وأجعل لقلبى ضلوع
واجعلنى صوت الشهيد
فى النبض والتنهيد
شريان فلسطينى شجر مزروع
فى الارض جدر وفى الليالى فروع
يسمعنى خال فى كل بلده وعم
جرح الملاجئ عمره ما يتلم
تفنى الليالى ولا يبور الدم
ولا طيارات الامريكان تمنع
النور من المصنع
ولا كل ريف تحت السما يسمع
طير الحمام يسجع
ولا ابن انسان الامل يرضع
ولا ليل شجاع يولد نهار أشجع
ولابد يوم أرجع
ويمد فى كل العرب حبلى
المشى طاب لى
والدق على طبلى
ناس كانوا قبلى
قالوا فى الامثال:
الرجل تدب مطرح ما تحب
وانا صنعت مسحراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
شيلينى يا دنيا
قبل النور وحطينى
بالراحه بالقوه
فى الريح الفلسطينى
خلينى قبل الصباح
أعرف صلاح دينى
اصحى يانايم
وحد الدايم
وقول نويت
بكره ان حييت
الشهر صايم
والفجر قايم
أصحى يانايم
وحد الرزاق
رمضان كريم
بقلم//فؤاد حداد
****************
*************
ـــــــــــــــــــــــــــــــــــــــــــــــــــــــــ
التصنيفات : شعراء عبر التاريخ | السمات:شعراء عبر التاريخ
أرسل الإدراج | دوّن الإدراج
أكتوبر 30th, 2007 at 30 أكتوبر 2007 11:39 م
الله مااروع المبدع فؤاد حداد
ديوان المسحراتى كله اروع من الروعه
تحياتى لاختيارك المميز
أكتوبر 31st, 2007 at 31 أكتوبر 2007 10:00 م
اشكرك سيدتي علي تو جدك الفعل
دمتي بكل الو د